രാജ്യത്തെ ഫാസ്ടാഗ് ചട്ടങ്ങളിൽ ഫെബ്രുവരി 17 മുതൽ മാറ്റം വരുത്താൻ നാഷണൽ പേയ്‌മെന്റ്‌സ് കോർപറേഷൻ ഓഫ് ഇന്ത്യ (എൻ.പി.സി.ഐ). തട്ടിപ്പുകൾ തടയാനും ടോൾ പിരിവ് കാര്യക്ഷമം ആക്കാനുമാണ് മാറ്റമെന്നാണ് വിശദീകരണം. നിയമലംഘനം നടത്തുന്നവരിൽ നിന്നും ഇരട്ടി ടോൾ തുക ഈടാക്കാൻ വരെ സാധിക്കുന്ന തരത്തിലാണ് പുതിയ ചട്ടങ്ങൾ. ഈ സാഹചര്യത്തിൽ ടോൾപ്ലാസകളിലെ മാറ്റങ്ങളെക്കുറിച്ച് അറിഞ്ഞിരിക്കേണ്ടത് അത്യാവശ്യമാണ്.
പ്രധാന മാറ്റങ്ങൾ
ഇക്കൊല്ലം ജനുവരി 28ന് എൻ.പി.സി.ഐ പുറത്തിറക്കിയ സർക്കുലർ പ്രകാരമുള്ള മാറ്റങ്ങൾ ഇവയൊക്കെയാണ്.
- ബ്ലാക്ക് ലിസ്റ്റഡ് ഫാസ്ടാഗ് – ബ്ലാക്ക് ലിസ്റ്റ് ചെയ്യപ്പെട്ട ഫാസ് ടാഗുമായി ടോൾ പ്ലാസയിലെത്തിയിട്ടും കാര്യമില്ല. ഇടപാട് നടത്താനാകില്ല. ടോൾ പ്ലാസയിലെത്തുന്നതിന് 10 മിനിറ്റ് മുമ്പ് ബ്ലാക്ക് ലിസ്റ്റിലായ ഫാസ്ടാഗുകൾ വഴിയുള്ള ഇടപാടുകളും നിരസിക്കപ്പെടും. ബാലൻസ് ഇല്ലാതിരിക്കുക, കെ.വൈ.സി പൂർത്തിയാകാതിരിക്കുക, വ്യത്യസ്ത ചേസിസ് നമ്പരും വാഹന രജിസ്‌ട്രേഷനും, നിയമനടപടി നേരിടുന്ന വാഹനങ്ങൾ എന്നീ സാഹചര്യങ്ങളിലാണ് സാധാരണ ഫാസ്ടാഗുകൾ ബ്ലാക്ക് ലിസ്റ്റിൽ പെടുത്തുന്നത്.
- വാഹനം ടോൾ പ്ലാസയിലെത്തുമ്പോൾ ഫാസ്ടാഗ് ബ്ലാക്ക് ലിസ്റ്റ് ചെയ്യപ്പെട്ടിട്ടുണ്ടെങ്കിൽ ഇരട്ടി ടോൾ നൽകേണ്ടി വരും. എന്നാൽ പ്രസ്തുത വാഹനം ടോൾ പ്ലാസ കടന്ന് 10 മിനിറ്റിനുള്ളിൽ ഫാസ്ടാഗ് റീച്ചാർജ് ചെയ്യുകയാണെങ്കിൽ പിഴത്തുക തിരികെ ലഭിക്കാനുള്ള ഓപ്ഷനുണ്ട്.
- ടോൾ പ്ലാസയിലെത്തുന്നതിന് 60 മിനിറ്റ് മുമ്പ് ഫാസ്ടാഗ് ബ്ലാക്ക് ലിസ്റ്റ് ചെയ്യപ്പെട്ടിട്ടുണ്ടെങ്കിൽ അവസാന നിമിഷം റീച്ചാർജ് ചെയ്യാൻ കഴിയില്ല.
- ഇടപാടുകൾ വൈകിയാലും കുടുങ്ങും – ടോൾ പ്ലാസയിൽ കൂടി വാഹനം കടന്നുപോയതിന് ശേഷം 15 മിനിറ്റിനുള്ളിൽ പേയെമെന്റ് പ്രോസസ് ആയില്ലെങ്കിലും അധിക ചാർജ് നൽകേണ്ടി വരും.
എങ്ങനെ തടയാം
ഫാസ്ടാഗ് അക്കൗണ്ടിൽ എപ്പോഴും ആവശ്യത്തിന് ബാലൻസ് ഉണ്ടെന്ന് ഉറപ്പുവരുത്തുക
ബ്ലാക്ക് ലിസ്റ്റ് ചെയ്യപ്പെടുന്നത് ഒഴിവാക്കാൻ എപ്പോഴും ഫാസ്ടാഗ് സ്റ്റാറ്റസ് പരിശോധിക്കുക
ഇടപാട് നടക്കുന്ന സമയത്ത് പേയ്‌മെന്റ് വൈകുന്നുണ്ടോ എന്ന് പരിശോധിക്കുക
ടോൾ പ്ലാസകളിലെ ബുദ്ധിമുട്ട് ഒഴിവാക്കാൻ ഫാസ്ടാഗ് എപ്പോഴും ആക്ടീവ് ആയി നിലനിർത്തുക. എൻ.പി.സി.ഐയുടെ വെബ്‌സൈറ്റിലെത്തിയാൽ ഫാസ്ടാഗ് ആക്ടീവ് ആണോ ഇല്ലയോ എന്നറിയാൻ പറ്റും. ഫാസ്ടാഗ് കസ്റ്റമർ പോർട്ടൽ വഴിയും എസ്.എം.എസ് അലർട്ടുകളിലൂടെയും ഫാസ്ടാഗ് കൃത്യമായി ട്രാക്ക് ചെയ്യാൻ പറ്റും.
നിങ്ങളുടെ ഫാസ്ടാഗ് ബ്ലാക്ക് ലിസ്റ്റിൽ ഉൾപ്പെട്ടാൽ ഇത് മാറ്റുന്നതിനുള്ള മാർഗങ്ങളും സാധ്യമാണ്. ഫാസ്ടാഗ് അക്കൗണ്ട് മിനിമം തുകക്കെങ്കിലും റീച്ചാർജ് ചെയ്യുകയാണ് ആദ്യ കടമ്പ. ഇടപാട് കൃത്യമായി നടന്നാൽ മിനിറ്റുകൾക്കുള്ളിൽ സിസ്റ്റത്തിൽ ഇക്കാര്യം അപ്‌ഡേറ്റാകും. ടോൾ പ്ലാസകളിൽ അനാവശ്യമായി സമയം കളയുന്നതിന് പകരം യാത്രക്കിറങ്ങുമ്പോൾ ഫാസ്ടാഗ് ഉൾപ്പെടെയുള്ള കാര്യങ്ങൾ കൃത്യമാണെന്ന് ഉറപ്പുവരുത്തുന്നത് നല്ലതാണ്.