പ്രിയങ്കാ ഗാന്ധിയുടെ തിരഞ്ഞെടുപ്പ് കന്നിയങ്കത്തിന് വേദിയാകുന്ന വയനാട്ടില്‍ വന്‍ജനാവലിയെ അണിനിരത്തി യുഡിഎഫിന്റെ റോഡ് ഷോ. പ്രിയങ്കയ്‌ക്കൊപ്പം രാഹുല്‍ ഗാന്ധിയും മല്ലികാര്‍ജുന്‍ ഖാര്‍ഗെയും രേവന്ത്‌ റെഡ്ഡിയും കെ.സുധാകരനും, പി.കെ കുഞ്ഞാലിക്കുട്ടിയും സാദിഖലി തങ്ങളും അണിനിരക്കുന്നു. പ്രിയങ്കയുടെ ഭര്‍ത്താവ് റോബര്‍ട്ട് വദ്രയും മകനും റോഡ്‌ഷോ വാഹനത്തില്‍ പ്രിയങ്കയോടൊപ്പം ജനങ്ങളെ അഭിവാദ്യം ചെയ്തു.
സോണിയാഗാന്ധിയും രാഹുല്‍ ഗാന്ധിയും പ്രിയങ്കാഗാന്ധിയും ഒന്നിച്ചൊരു തിരഞ്ഞെടുപ്പ് പ്രചരണത്തിന് പങ്കെടുക്കുന്നത് കേരളത്തില്‍ ഇതാദ്യമാണ്. വയനാട്ടില്‍ യുഡിഎഫിന്റെ കരുത്ത് തെളിച്ചുകൊണ്ടുള്ള റോഡ് ഷോയ്ക്ക് ശേഷമാകും പ്രിയങ്കയുടെ പത്രിക സമര്‍പ്പണം.പ്രിയങ്കയും രാഹുലും സോണിയയും വയനാട്ടിലെത്തിയ ആവേശം പ്രവര്‍ത്തകര്‍ ആഘോഷിക്കുമ്പോള്‍ നാട്ടുകാര്‍ ആവശ്യങ്ങളുടെ നീണ്ടനിര തന്നെ സ്ഥാനാര്‍ഥിക്കുമുമ്പില്‍ നിരത്തുന്നുണ്ട്. തിരഞ്ഞെടുക്കപ്പെട്ട് പോയാല്‍പ്പിന്നെ തിരിഞ്ഞുനോക്കാത്ത അവസ്ഥ ഉണ്ടാക്കുന്നവര്‍ക്ക് വോട്ടില്ലെന്നും റോഡ്‌ഷോ കാണാനെത്തിയവരില്‍ ചിലര്‍ പറയുന്നുണ്ട്.