ആറ്റിങ്ങലിൽ ബിജെപിയുടെ രണ്ട് സിറ്റിങ് സീറ്റുകൾ പിടിച്ചെടുത്ത് എൽ ഡി എഫ്
ആറ്റിങ്ങൽ നഗരസഭയിലെ ചെറുവള്ളിമുക്ക്‌, തോട്ടവാരം വാർഡുകളിലേക്ക് നടന്ന ഉപതെരഞ്ഞെടുപ്പിൽ ബിജെപിയുടെ സിറ്റിങ് സീറ്റുകൾ എൽ ഡി എഫ് പിടിച്ചെടുത്തു. ചെറുവള്ളിമുക്കിൽ എൽഡിഎഫ് സ്ഥാനാർത്ഥി എം എസ്‌ മഞ്ജുവും തൊട്ടവാരത്ത്‌ ജി ലേഖയുമാണ് ജയിച്ചത്. രണ്ടിടത്തും ബി ജെ പി മൂന്നാമതായി.രണ്ടിടത്തേയും ബിജെപി അംഗങ്ങൾ രാജിവെച്ചതിനെ തുടർന്നാണ് ഉപതെരഞ്ഞെടുപ്പ് നടന്നത്. ചെറുവള്ളിമുക്കിൽ കഴിഞ്ഞ തവണ നാല്‌ വോട്ടിനായിരുന്നു ബിജെപിയുടെ വിജയം.
ഉടുമ്പൻചോലയിൽ എൽഡിഎഫിന് 505 വോട്ടിന്റെ വിജയം
ഉടുമ്പൻചോല പഞ്ചായത്തിലെ എട്ടാം വാർഡിലേക്ക് (പാറത്തോട്) നടന്ന ഉപ തെരഞ്ഞെടുപ്പിൽ എൽ ഡി എഫിന് വിജയം. എൽ ഡി എഫ് സ്ഥാനാർഥി യേശുദാസ് 505 വോട്ടിന്റെ ഭൂരിപക്ഷത്തിലാണ് ജയിച്ചത്. കോൺഗ്രസിലെ എതിർസ്ഥാനാർത്ഥിക്ക് 94 വോട്ടുകൾ മാത്രമാണ് ലഭിച്ചത്. സി പി ഐ എം അംഗം മരിച്ചതിനെ തുടർന്നാണ് ഉപ തെരഞ്ഞെടുപ്പു വേണ്ടി വന്നത്. കഴിഞ്ഞ തവണ 404 വോട്ടിന്റെ ഭൂരിപക്ഷത്തിലായിരുന്നു എൽ ഡി എഫ് ജയം.
കാങ്കോൽ– ആലപ്പടമ്പ് പഞ്ചായത്തിൽ പ്രതിപക്ഷമില്ല; സിറ്റിങ് സീറ്റ് നിലനിർത്തി എൽഡിഎഫ്
കണ്ണൂർ കാങ്കോൽ– ആലപ്പടമ്പ് പഞ്ചായത്തിൽ എൽ ഡി എഫിന് വിജയം. പഞ്ചായത്തിലെ ഏഴാം വാർഡിലേക്ക് നടന്ന ഉപതെരഞ്ഞെടുപ്പിൽ എൽ ഡി എഫ് സ്ഥാനാർഥി എം ലീല 188 വോട്ടിന്റെ ഭൂരിപക്ഷത്തിൽ വിജയിച്ചു.
ആകെ 824 വോട്ട് രേഖപ്പെടുത്തിയതിൽ 484 വോട്ട് എൽ ഡി എഫിന് ലഭിച്ചു. എൻ ഡി എ സ്ഥാനാർഥി എ ജയന്തി രണ്ടാം സ്ഥാനത്തും യു ഡി എഫ് സ്ഥാനാർഥി കെ രജനി മൂന്നാം സ്ഥാനത്തുമാണ്.
സി പി ഐ എം അംഗം മരിച്ചതിനെ തുടർന്നാണ് തെരഞ്ഞെടുപ്പ്‌. എൽ ഡി എഫ് അംഗങ്ങൾ മാത്രമുള്ള പ്രതിപക്ഷം ഇല്ലാത്ത പഞ്ചായത്താണ്‌ കാങ്കോൽ– ആലപ്പടമ്പ്.