മലയാളത്തിൽ ഏകാങ്ക നാടകങ്ങളെയും ബാലനാടകത്തെയും ഒരു പ്രസ്ഥാനമാക്കി വളർത്തിയ, പരീക്ഷണാത്മക നാടകത്തിന്റെ വക്താവായിരുന്ന മലയാളത്തിലെ ശ്രദ്ധേയനായ നാടകകൃത്ത് എന്നതിനപ്പുറം കുട്ടികൾക്ക് ഒരു നാടകവേദി എന്ന ആശയം സഫലമാക്കിയ നാടകക്കളരി പ്രസ്ഥാനത്തിന്റെ സ്ഥാപകനായിരുന്നു പ്രൊഫ: ജി ശങ്കരപ്പിള്ള. സംഗീത നാടകങ്ങളും കച്ചവടനാടകങ്ങളും അരങ്ങുവാഴും കാലത്ത് നാടകക്കളരി പ്രസ്ഥാനത്തിലൂടെ മലയാള നാടകവേദിയുടെ വഴി തിരിച്ചുവിട്ട അദ്ദേഹം പുതിയൊരു സംവേദനശീലവും പുതിയൊരു രംഗ പ്രയോഗവും അതുവരെയുണ്ടായിരുന്ന കാഴ്ചശീലങ്ങളെ മാറ്റിമറിച്ചു. ആ നാടകങ്ങളിലൂടെ പുതിയൊരു അരങ്ങും പുതിയ കാണികളും പുതിയ നടീ നടന്മാരുമുണ്ടായി. മലയാള നാടകവേദിയെ പുതിയ പരീക്ഷണങ്ങള്‍ക്കു വിധേയമാക്കി.
1930 ജൂൺ 22 ന് തിരുവനന്തപുരം ചിറയിൻകീഴ് താലൂക്കിലെ നാലുതട്ടുവിളയിൽ ഒറ്റവീട്ടിൽ വി ഗോപാലപിള്ളയുടെയും മുട്ടയ്ക്കൽ കമലാക്ഷി അമ്മയുടെയും മകനായാണ് പിള്ള ജനിച്ചത്. കൊല്ലം, ചിറയിൻകീഴ്, ആറ്റിങ്ങൽ, തിരുവനന്തപുരം എന്നിവിടങ്ങളിൽ നിന്ന് സ്കൂൾ വിദ്യാഭ്യാസം പൂർത്തിയാക്കി. 1952-ൽ ട്രാവൻകൂർ സർവ്വകലാശാലയിൽ നിന്ന് (ഇന്നത്തെ കേരള സർവകലാശാല) മലയാള സാഹിത്യത്തിൽ ഒന്നാം റാങ്കോടെ ബിരുദാനന്തര ബിരുദം നേടി. 1953 മുതൽ 1960 വരെ മധുരയിലെ ഗാന്ധിഗ്രാം റൂറൽ ഇൻസ്റ്റിറ്റ്യൂട്ട് ഉൾപ്പെടെ വിവിധ കോളേജുകളിൽ അദ്ധ്യാപകനായി പ്രവർത്തിച്ചു. 1961 മുതൽ 1964 വരെ കേരള സർവകലാശാലയുടെ നിഘണ്ടു ഓഫീസിൽ പ്രവർത്തിച്ച ശേഷം 1967-ൽ ശാസ്താംകോട്ട ദേവസ്വം ബോർഡ് കോളേജിൽ അദ്ധ്യാപകനായി. 1977 വരെ അവിടെ തുടർന്നു.
1954-ൽ കേരള സർവ്വകലാശാലയിൽ ചേർന്നു. കേരളത്തിലെ നാടോടി സംഗീത പാരമ്പര്യത്തെക്കുറിച്ചുള്ള ഗവേഷണത്തിനായി 1957-ൽ മധുരയിലേക്ക് മാറി ഗാന്ധിഗ്രാം റൂറൽ ഇൻസ്റ്റിറ്റ്യൂട്ടിൽ അദ്ധ്യാപകനായി ജോലിയിൽ പ്രവേശിച്ചു.
1964-ൽ ശാസ്താംകോട്ട ദേവസ്വം ബോർഡ് കോളേജ് സ്ഥാപിതമായപ്പോൾ, സ്ഥാപനത്തിൽ ഫാക്കൽറ്റിയായി ചേർന്നു.
കേരള യൂണിവേഴ്‌സിറ്റി, കാലിക്കറ്റ് യൂണിവേഴ്‌സിറ്റി, ഗാന്ധിഗ്രാം, തഞ്ചാവൂർ യൂണിവേഴ്‌സിറ്റി എന്നിവിടങ്ങളിലെ ബോർഡ് ഓഫ് സ്റ്റഡീസിലും ഫൈൻ ആർട്‌സ് ഫാക്കൽറ്റിയിലും ഫൈൻ ആർട്‌സിനായി യു ജി സി രൂപീകരിച്ച പാഠ്യപദ്ധതി വികസന സമിതിയിലും അംഗമായിരുന്നു.1977-ൽ കാലിക്കറ്റ് സർവകലാശാലയുടെ സ്കൂൾ ഓഫ് ഡ്രാമ ആൻഡ് ഫൈൻ ആർട്സിൻ്റെ സ്ഥാപക ഡയറക്ടറായി.
കന്നഡ എഴുത്തുകാരനും സർവകലാശാലയുടെ അന്നത്തെ വൈസ് ചാൻസലറുമായ യു ആർ അനന്തമൂർത്തി ശങ്കര പിള്ളയെ സ്ഥാപനത്തിൻ്റെ തലവനായി ക്ഷണിച്ചു. സി എൻ ശ്രീകണ്ഠൻ നായർ, എം ഗോവിന്ദൻ, എം വി ദേവൻ, കെ എസ് നാരായണ പിള്ള, കെ അയ്യപ്പപ്പണിക്കർ എന്നിവർക്കൊപ്പം 1967-ൽ കേരളത്തിൽ നാടക കളരി പ്രസ്ഥാനം ആരംഭിച്ചതാണ് അദ്ദേഹത്തിൻ്റെ പ്രധാന സംഭാവനകളിലൊന്ന്.
വയലാ വാസുദേവൻ പിള്ള അടക്കം നിരവധി നാടക പ്രവർത്തകരെ പരിപോഷിപ്പിക്കുകയും സി ജെ തോമസിൻ്റെ അവൻ വീണ്ടും വരുന്നു പോലെയുള്ള മുൻകാല നാടകങ്ങളെ പുതിയ രൂപത്തിൽ പുനരുജ്ജീവിപ്പിക്കാൻ സഹായിക്കുകയും ചെയ്തു. കേരള സംഗീത നാടക അക്കാദമി ചെയര്‍മാനായിരുന്നു. 1980- ല്‍ തനതു നാടകവേദിയുമായി ബന്ധപ്പെട്ട് തൃശൂരില്‍ രൂപീകരിച്ച രംഗചേതനയുടെ രക്ഷാധികാരിയായി.
സ്നേഹദൂതൻ, സബർമതി ദൂരെയാണ്, മൂന്ന് പണ്ഡിതന്മാരും പരേതനായ ഒരു സിംഹവും തുടങ്ങി ഇരുപത്തഞ്ചിലധികം ഏകാങ്കനാടകങ്ങൾ രചിച്ചിട്ടുണ്ട്. കേന്ദ്ര സാഹിത്യ അക്കാദമി അവാർഡ്, കേരള സാഹിത്യ പരിഷത്ത് അവാർഡ്, സാഹിത്യ പ്രവർത്തക സഹകരണ സംഘം തുടങ്ങിയ അവർഡുകളും ലഭിച്ചിട്ടുണ്ട്.1989 ജനുവരി 1 ന് അന്തരിച്ചു.
1960 കളിലാണ് കുട്ടികൾക്കായി ഒരു നാടകവേദി എന്ന ആശയം ഉദിക്കുന്നത്. തിരുവനന്തപുരത്തെ വെഞ്ഞാറമൂട് കേന്ദ്രീകരിച്ച് രംഗപ്രഭാത് എന്ന പേരിൽ കുട്ടികളുടെ നാടകവേദിക്ക് അദ്ദേഹം തുടക്കമിട്ടു. കുട്ടികളെ പൂർണ്ണമായും ഉൾപ്പെടുത്തിക്കൊണ്ടും അവരുടെ ആശയങ്ങൾക്ക് പ്രാധാന്യം കൊടുത്തുകൊണ്ടുമുള്ള അവതരണങ്ങളാണ് ഉണ്ടായത്. തുടർന്ന് ശങ്കരപ്പിള്ള കുട്ടികൾക്കായി 30 ഓളം നാടകങ്ങളും രചിച്ചു. ഗുരുദക്ഷിണ, പുഷ്പകിരീടം, നിഴൽ, ഒരുകൂട്ടം ഉറുമ്പുകൾ, ചിത്രശലഭങ്ങൾ എന്നിവ അവയിൽ ചില നാടകങ്ങളാണ്. എഴുതിയ നാടകങ്ങളെല്ലാം രംഗപ്രഭാതിൽ അവതരിപ്പിക്കാനും അദ്ദേഹത്തിന് കഴിഞ്ഞു.
പ്രധാന നാടകങ്ങൾ : സ്നേഹദൂതൻ (1956), വിവാഹം സ്വർഗത്തിൽ നടക്കുന്നു (1958), റെയിൽപ്പാളങ്ങൾ, പൂജാമുറി (1966), ഭരതവാക്യം (1972), ബന്ദി (1977), മണൽത്തരികൾ (1978), കറുത്ത ദൈവത്തെ തേടി (1980), കിരാതം (1985), സബർമതി.