നിരോധിച്ച നോട്ടുകൾ കണ്ണനിരിക്കട്ടേന്ന്

ഗുരുവായൂർ ക്ഷേത്രത്തിൽ മാർച്ച് മാസത്തെ ഭണ്ഡാരം എണ്ണൽ പൂർത്തിയായി. 5,21,68,713 രൂപ ഭണ്ഡാര വരവായി ലഭിച്ചു. ഇതോടൊപ്പം രണ്ടു കിലോ 526 ഗ്രാം 200 മില്ലിഗ്രാം സ്വർണ്ണവും ലഭിച്ചു . 18 കിലോ 380ഗ്രാം വെള്ളിയും ലഭിച്ചതായി ഭാരവാഹികൾ അറിയിച്ചു.കഴിഞ്ഞ മാസങ്ങളിലെ പോലെ ഇത്തവണയും നിറയെ നിരോധിച്ച നോട്ടുകളും കിട്ടി. കേന്ദ്ര സർക്കാർ പിൻവലിച്ച 141 നോട്ടുകളാണ് ഭണ്ഡാരത്തിൽ നിന്നും ലഭിച്ചതെന്ന് ഭാരവാഹികൾ അറിയിച്ചു.

ഇതിൽ രണ്ടായിരത്തിൻ്റെ 47 നോട്ടുകളും നിരോധിച്ച ആയിരം രൂപയുടെ 18 നോട്ടുകളും അഞ്ഞൂറിന്‍റെ 76 നോട്ടുകളുമുണ്ടായിരുന്നു. ഗുരുവായൂർ സി എസ് ബി ശാഖയ്ക്കായിരുന്നു ഇത്തവണത്തെ എണ്ണൽ ചുമതല. ഇ-ഭണ്ഡാര വരവ് 7.22 ലക്ഷം രൂപയാണെന്നും ഭാരവാഹികൾ അറിയിച്ചു. ക്ഷേത്രം കിഴക്കേ നടയിലെ എസ് ബി ഐയുടെ ഇ-ഭണ്ഡാരം വഴി 7,22,473 രൂപയാണ് ലഭിച്ചത്. സ്ഥിരം ഭണ്ഡാര വരവിനു പുറമെയുള്ള കണക്കാണിതെന്ന് ഭാരവാഹികൾ പറഞ്ഞു.