ബാഡ്മിന്റൺ ഏഷ്യൻ ടീം ചാംപ്യൻഷിപ് ഫൈനലിൽ ഇടം പിടിച്ച് ഇന്ത്യൻ വനിതകൾ. ആദ്യമായാണ് ചാംപ്യൻഷിപ്പിൽ ഇന്ത്യ ഫൈനൽ യോഗ്യത നേടുന്നത്. ലോക റാങ്കിങ്ങിൽ 472-ാം സ്ഥാനത്തുള്ള അൻമോൽ ഖർബ് ജപ്പാന്റെ 29-ാം റാങ്കിലുള്ള നതസുകി നിദെയ‌രയെ അട്ടിമറിച്ചു. സ്കോർ 21-14, 21-18. ജപ്പാനെതിരെ 3-2ന്റെ വിജയവുമായി ഇന്ത്യ ഫൈനലിലെത്തി.
നേരത്തേ മലയാളി താരം ട്രീസ ജോളി- ഗായത്രി ഗോപിചന്ദ് സഖ്യം ആറാം റാങ്കിലുള്ള താരങ്ങളും മുൻ ഓൾ ഇംഗ്ലണ്ട് ചാംപ്യൻമാരുമായ ഷിദ- മത്സുയാമ സഖ്യത്തെ കീഴടക്കിയിരുന്നു. 16-21,22-20 സ്കോറിലായിരുന്നു ഇന്ത്യൻ സഖ്യത്തിന്റെ വിജയം. തായ്ല‌ൻഡിനെതിരെയാണ് ഇന്ത്യയുടെ ഫൈനൽ മത്സരം. 2016, 2020 എഡിഷനുകളിൽ ഇന്ത്യൻ പുരുഷ ടീം വെങ്കലം സ്വന്തമാക്കിയിരുന്നു. ഇത്തവണ പുരുഷ ടീം ക്വാർട്ടറിൽ പുറത്തായി.