അടുത്ത മൂന്ന് വർഷത്തിനുള്ളിൽ ഇന്ത്യൻ ഭാഷകളിൽ ഡിജിറ്റൽ പഠന സാമഗ്രികൾ നൽകണമെന്ന് എല്ലാ സ്‌കൂളുകളോടും ഉന്നത വിദ്യാഭ്യാസ സ്ഥാപനങ്ങളോടും കേന്ദ്ര സർക്കാർ നിർദേശം. എല്ലാ തലത്തിലും വിദ്യാഭ്യാസത്തിൽ ബഹുഭാഷാവാദത്തെ പ്രോത്സാഹിപ്പിക്കുന്ന ദേശീയ വിദ്യാഭ്യാസ നയത്തിന് (NEP 2020) അനുസൃതമായാണ് തീരുമാനം. യുജിസി, എഐസിടിഇ, എൻസിഇആർടി, എൻഐഒഎസ്, ഇഗ്നോ തുടങ്ങിയ എല്ലാ സ്കൂൾ, ഉന്നത വിദ്യാഭ്യാസ റെഗുലേറ്റർമാരും ഐഐടികൾ, സിയു, എൻഐടികൾ തുടങ്ങിയ ഐഎൻഐകളുടെ മേധാവികളും എല്ലാ കോഴ്സുകൾക്കും ഇന്ത്യൻ ഭാഷകളിൽ പഠന സാമഗ്രികൾ ലഭ്യമാക്കണമെന്ന് വിദ്യാഭ്യാസ മന്ത്രാലയത്തിന്റെ ഔദ്യോഗിക അറിയിപ്പ് വ്യക്തമാക്കുന്നു .
യുജിസി, എഐസിടിഇ, സ്കൂൾ വിദ്യാഭ്യാസ വകുപ്പ് എന്നിവയോടും സംസ്ഥാന സ്കൂളുകളുമായും സർവകലാശാലകളുമായും ബന്ധപ്പെട്ട നടപടി സ്വീകരിക്കാൻ ആവശ്യപ്പെട്ടിട്ടുണ്ട്. രാജ്യത്തുടനീളമുള്ള ഭാഷാ തടസ്സം ഇല്ലാതാക്കുക എന്ന ലക്ഷ്യത്തോടെയാണ് ഈ നീക്കം അവതരിപ്പിച്ചതെന്ന് വിദ്യാഭ്യാസ മന്ത്രാലയം അറിയിച്ചു. ഇത് വിദ്യാർത്ഥികൾക്ക് അവരുടെ മാതൃഭാഷകളിൽ പഠിക്കാനും മെച്ചപ്പെട്ട പഠന ഫലങ്ങൾക്കായി നൂതന ചിന്തകൾ പ്രോത്സാഹിപ്പിക്കാനും അനുവദിക്കും.